كيف تنتقي الخرطوش والشوك المناسب حسب نوع الطير

حصريأ لمنتدى الصياد اللبناني: كيف تنتقي الخرطوش والشوك المناسب حسب نوع الطير- دليلك للصيد الناجح

حاولت ان اجمع في هذا الموضوع المعلومات الاساسية للشوكات والخرطوش واختصرتها قدر المستطاع لتكون دليلا عمليا للصياد واعتمدت فيها على المقاييس العالمية من اهم صانعي البنادق والخرطوش مثل Winchester, Browning , Fiocchi الخ من الاسماء العريقة، وطبعا وضعت عليها اللمسة اللبنانية للطيور التي تمر ببلدنا دون سواها...

- عليك ان تعلم اولا انه لا يوجد خرطوشة او شوك مناسب لمختلف انواع الصيد فكل صنف من الطيور توليفة خاصة من حيث عيار الخرطوشة وحجم الخردق والشوك المناسب
- عادة الخرطوش الاجنبي تستطيع تحديد هذه المعايير بسهولة بخلاف الخرطوش الوطني
- الشوكات تتبع لنظام عالمي لكن تختلف تسميته احيانا لكن من السهل معرفتها
- لحرارة الطقس والضغط الجوي اثر لاباس به على سرعة الخرطوشة وتوزيع الخردق (تزداد السرعة والانتشار من 5 الى 10% على ارتفاع 1500متر مقارنة بسطح البحر)

اهم عيارين نستخدمهما في لبنان 12 و 36 ( المتعارف عليه بـ 12 رفيع) سنتناول في موضوعنا العيار 12 حيث ان 36 ياتي بعبارات محدودة

الشوكات: والمستخدم منها في الصيد خمسة وهي:

الرقم	الاسم	الرمز	الشرح	المدى
1	Full	*	اضيق شوك مما يعنى اصغر دائرة من الخردق وابعد مدى	للاهداف من 40 الى 60 متر
2	Imp. Mod	**	اوسع بقليل من السابق	للاهداف البعيدة من 30 الى 50 متر
3	Mod	***	معتدل من حيث المدى وتوزيع الخردق (المفضلة لمعظم الصيادة)	للاهداف من 25 الى 45 متر
4	Imp. Cyl	****	اوسع بقليل من السابق	للاهداف القريبة من 20 الى 40 متر
5	Cyl	*****	اوسع شوك يعني اكبر دائرة واقصر مدى	للاهداف من 15 الى 30 متر

رسم توضيحي:




اما الخردق فكلما صغر الرقم كبر حجم الخردق وطبعا قل عددها:

الرقم	4	5	6	7	8	9	10
عرض الخردق	3.25	3.05	2.79	2.59	2.31	2.03	1.78
الكمية في 28غرام	132	168	218	291	399	568	848

رسم توضيحي من Browning يبرز دور نمرة الخردق لاحظ كلما اصبح الخردق اكبر كلما زاد المدى:



-----------------------------------------------------


نأتي الى الطيور والخرطوش المناسب لها:

للعصافير والطيور الصغيرة استعمل رقم 10 واخف خرطوشة بتقوصها بارودتك (اذا معك اوتوماتيك)

- المطوق
الشوك المفضل: رقم 3 (***)
الخرطوش المفضل: 28g نمرة 9
طول السبطانة من 67 الى 71 سنتم


- الفري
الشوك المفضل: رقم 4 (****) اذا معك جفت استعمل رقم 5 و 4
الخرطوش المفضل: 30g نمرة 9 وعليه عبارة Disperser اذا كنت عم تسال ليش Disperser لانو هيدي الخرطوشة مصممة لتفلش الخردق بشكل اكبر ومتوازن وذلك بفضل شكل البلاستيك الحامل للخردق
طول السبطانة 67 سنتم


- السمن الزرزور الورور
الشوك المفضل: رقم 3 (***)
الخرطوش المفضل: 32g نمرة 9
طول السبطانة من 67 الى 71 سنتم


- الترغل الطيبت
الشوك المفضل: رقم 3 (***)
الخرطوش المفضل: 32g نمرة 8
طول السبطانة من 67 الى 71 سنتم


- دجاج الارض
الشوك المفضل: رقم 4 (****) اذا معك جفت استعمل رقم 4 و 3
الخرطوش المفضل: 34g نمرة 8 Disperser
طول السبطانة 67 سنتم

-----------------------------------------------------

كلما زاد وزن الخردق كلمات اصبحت الخطوشة ابطأ لذلك عمد المصنعون الى ابستعمال نوع بارود اقوى يعطي سرعة اعلى وكتب عليها خرطوش سريع (Super Speed, High Velocity, High Speed, الخ) استعملها لهذه الانواع من الطيور:

- الحجل
الشوك المفضل: رقم 3 (***) في المناطق الحرجية، رقم 1 (*) في المساحات المفتوحة والمجلات البعيدة
الخرطوش المفضل: 36g نمرة 7 High Speed
طول السبطانة من 67 الى 71 سنتم


- الدلم
الشوك المفضل: رقم 3 (***)
الخرطوش المفضل: 36g نمرة 6 High Speed
طول السبطانة من 67 الى 71 سنتم


- البط
الشوك المفضل: رقم 3 (***) فوق البرك، رقم 1 (*) للبط العالي و البعيد
الخرطوش المفضل: 40g نمرة 5 High Speed
اذا كان البط صغير استعمل 36g نمرة 6 اما اذا كان كتير كبير استعمل خرطوش اقوى حتى نمرة 4
طول السبطانة من 67 الى 71 سنتم فوق البرك من 76 الى 81 سنتم للبط العالي و البعيد


-----------------------------------------------------

قواعد عامة:
القاعدة رقم 1: في المناطق الحرجية والشجرية المسافة بينك بين الطير ما رح تكون كبيرة لذلك استعمل الشوكات المفتوحة و خردق انعم هيك بتعطي انتشار افضل للخردق وبالتالي امكانية الاصابة اكبر
القاعدة رقم 2: في المجالات المفتوحة كالسهول والمنطق المكشوفة الطيور عادة بتكون بعيدة عنك لذلك استعمل الشوكات الضيقة وخردق اكبر لانها بتعطي مجال اكبر للخرطوشة وبتحافظ على عزمها
القاعدة رقم 3: عند استعمال شوك واسع استعمل خرطوشة اكبر لتحافظ على كثافة الخردق

-----------------------------------------------------

الهدف من الموضوع مش انو نقول هيدي الخرطوشة منيحة وهيدا لأ بالنهاية كلو خرطوش، واذا الطير بمجال جيد وصبته بدو ينزل، بس منيح نعرف شو هيي المقاييس المتبعة وخاصة للمبتدئين يللي ما جربوا هيك انواع طيور
انا مذكر مرة قوصت فرفورين بط عالطاير بخرطوشة 24غرام نمرة 10 كنت عم اتصيد صلنجات بوقتها وطارو من قدامي، بس اكيد هيدي مش عبرة لانو اذا كانو شوي بعاد مستحيل ينزلو...

في النهاية تمنياتي للجميع بصيد موفق

- لوضعه في منتدى آخر رجاء أذكر المصدر: منتدى الصياد اللبناني -

حبييت ضيف بعد شغلة من تجربتي الخاصة اعتبرها نصيحة اخوية:

- المطوق والصلنجات صيدها بيصرف خرطوش لذلك فيك تستعمل خرطوش وطني فيه شوي توفير بالرغم انو في بعض الانواع الاجنبية بالسوق سعرها صار قريب للوطني...

- اما الطيور المتوسطة والكبيرة متل الترغل والحجال ودجاج الارض والبط فاعداده قليلة وما بتصرف كتير خرطوش بصيده لذلك نصيحتي ادفع كم الف ليرة زيادة وما تستعمل غير خرطوش اجنبي مخصص لكل نوع بنوعه واغلب الخرطوش الاجنبي مكتوب عليه لاي نوع من الطيور واذا مش مكتوب بتطلعه عالانترنت...

انا مش ضد الصناعات الوطنية.. بس المشكلة انه معظم الخرطوش الوطني عياراته مش مضبوطة كل علبة بتطلع شكل بالطيور الصغيرة ما في مشكلة بتفنكح كم عصفور بس بالطيور الكبير بيضل بدنك مسمو كل النهار

يعطيك لعافية خية على هالموضوع روعة ومعلمومات مهمة يلي بتفيد جميع,لازم لواحد يختار الخرطوش والشوك المناسب للسلاح يلي عميتسعملو لآنو بيلعبو دور كبير برماية وأصابة هدف,تصيحة صغيرة لمستخدمين ألبيكال أنا شوكات يلي كانو مع بارودة داخليات lead choke ,بس بتصدق على مسافات قريبة يعني ما بين 25,30 متر ما عجبني رمية على قريب فشتريتلي لشوك فول لبراني أه بعد تجربة شي ولا أروع فجربنى على لسكعكع بوقتا 20 خرطوشة ميرا 28 غرام جبنى فيهن 20 وحدة سكعكع وعلى مسافات بعيدة يفلش خردق على طير بشكل أحسن.

يعطيك الف عافيه روعه ولله وان كشخص غير متمرس وقليل الخبره كان ناقصنا هيك معلومات مشطور يا كبير وبشكر الاخ علي دوما ايضا بيتحفنا بمرورو العطر وتجاربهااخSNIPER
فشيتلي البي بهل المعومات بدنا بعد متل ما بقولو كتير دعك لنوصل مشكورين

موضوع روعة تسلم على المجهود الرائع
و إذا حداً من الشباب بيعرف وين ممكن نحصل على تشوكات للبايكال ببيروت ؟

تحياتي

حابب وضح مسالة بخصوص الخرطوش السريع، ما حدا يفكر انو خرطوش سريع يعني صارت الخرطوشة متل الرصاصة .. ابدا مش هيك .. لاعطيك متل، عند شركة ال Winchester:
الخرطوش العادي سرعته بين 385 - 395 متر بالثانية، اما الخرطوش السريع فسرعته بين 415 و 425 متر بالثانية ... هيدا عند الانطلاق اما عالمسافات بتنزل بعد السرعة..

لاحظ انو الفرق مش شي خيالي يعني اقل من 10% واحيانا بيلامس 5%...
للطيور السريعة متل الحجل والبط ... بتحس بالفرق لانو كلما زادت سرعته كلما خف ضغط الخرطوشة وتاثيرها بيضعف عليه... بالخرطوش السريع بتوصل لعندو اقوى...

انشاء الله تكون الفكرة وصلت
تحياتي للجميع

بشرفكن عندي مشكلة بانتقاء الخرطوش والشوك المناسب لصيد الورور!!!!

ايام عم يمرء قريب وايام بيكون عالي, وعم قوس بالشوك رقم 3 وخرطوش فينيكس رقم9 /28غ!!

بدك تكبر العيار شوي خلي 6 او 7 لتكسرها
تحياتي

بس يكون عالي ركب شوك 2 وخردق رقم 8... وادعيلي

مشكور على هذا الموضوع المهم
انه يساعد و يسهل عمل الصياد
و يعلم الصياد على صحة استخدام بارودته
وشكرا......

يعني بنا نضل نلعب بالشوكات!!على كل حال مشكورين ياشباب!!! قرب المطوق هلأ حضرو حالكم!!!! بدي اسأل بعدو الطيبت هوي ذاته من قول عنو (نو)؟؟؟؟

مشكور عالموضوع ونصيحة بالوطني افضل شي فينكس و df عن تجربة
حدا بوافقني الراي؟؟؟؟؟؟؟؟

انا بستعمل goldenhunter ما في متلو

يعطيك الف عافيه

الله يعطيق الف عافيه موضوع جداً مفيد وخاصه للمبتدئن٠

صديقي العزيز اشكرك جدا على هذه المعلومات لكن نوعية الخراطيش جميعها تركي وانا عانيت من حيث عند استخدامي لخرطوش الرقم 6 قد ادى الى كسر الحاضن الخاص بالخراطيش علما ان بندقية نوع اوسكار تركي ذات ال5 اطلاقات افدني يا صديقي العزيز

مشكورين على المعلومات المهمة

سيف البابلي كتب:صديقي العزيز اشكرك جدا على هذه المعلومات لكن نوعية الخراطيش جميعها تركي وانا عانيت من حيث عند استخدامي لخرطوش الرقم 6 قد ادى الى كسر الحاضن الخاص بالخراطيش علما ان بندقية نوع اوسكار تركي ذات ال5 اطلاقات افدني يا صديقي العزيز

اذا كان الحاضن بلاستيك فلا انصحك باستخدام هذه الخراطيش... اما اذا كان نحاس فاعتقد وللاسف ان هناك خللا في حجرة النار في البندقية وعادة ما تكون اوسع من الخرطوشة مما يؤدي الى انكسار الحاضن...

الله يعطيق الف عافيه موضوع حلو

موضوع رائع أخي sniper

رائع